மல்லிகையும் மருதாணியும்

தென்றல் முகர்ந்ததால் தேன்மலர் மொட்டவிழும்
உன்றன் கணவர் உரசியதால் மேனியெங்கும்
சென்று உணர்வும் சிலிர்த்திடும் காமனை
வென்று படுக்கையில் வீழ்த்து.

உன்னையும் என்னையும் உன்றன் கணவன்தான்

பொன்னுமிவ் வந்திப் பொழுதில் கசக்குவான்

காதலைக் காமக் கரையில் விளக்குவான்

காதரு கில்பூ கதைத்து.

 காணுங் கரங்களும் கன்னச் செழுமையிலும்

 நாணச்  சிவப்புடன் நான்தந்த      மாற்றம்

 ஒருநாளும் மாறுமோ உள்ளன்பின் தோற்றம்

 மருதாணிச் சொல்லும் மகிழ்ந்து

ஈர்ப்பதில் மல்லிகை மணத்துடன் மருதாணி

..........சேர்ப்பதும் மனத்தினில் மயக்கமே வருதாமே

வார்த்திடும் பேச்சினில் இனிமையே உருவாகப்

..........பார்த்திடும் பார்வையில் அழைப்புதான் கருவாகிக்

கூர்த்திடும் சமிக்ஞையைக் கொண்டவன் திருவாக

.........மூர்க்கமும் இன்றியே முழுவதும் தருவானே

ஆர்த்திடும் உணர்வினைத் தீயதாய்க் கருதாமல்

.......தீர்த்திடத் திருமணம் நன்மையாய் வருதாமே!

கவலையும் சுழலுமே கனமுளத் தருணமாய்

அவளையும் தனிமையும் அணைத்திடும் பொழுதினில்

கணவனை அறிந்திடாக் கணங்களாய்க் கழிவதால்

மணமது புரிந்திட மணமகள் உடையினை

அணிந்திடும் மகிழ்வினை அகத்தினில் நிரப்பியே

மலர்ந்திடும் பொழுதினை மனத்தினில் வளர்த்ததால்

அழகுறுக் குழலுடன் அலைமுகில் வடிவென

மெழுகதுச் சிலையென முழுவதும் எழிலுடன்

மழலையின் இனிமையாய மயக்கிடும் குரலுடன்

நிழலது வழங்கிடும் நிகரிலாக் குளுமையும்

சுழலுரும் மணியிசைச் சுகந்தரும் நடையினில்

முழுவதும் இலகுவாய் மெதுநடை பழகுமே!

சுழலொரு புயலெனச் சுழன்றதன் விருப்பமும்

முழுவதும் மனத்தினில் மொத்தமாய்க் குடிபுக

அணைத்திடும் இலக்கணம் அனைத்தையும் அறிந்தவன்

துணையெனக் கிடைத்திடத் துளிர்த்தன மகிழ்ச்சியும்

தளதளச்  சதையுடன் தடையிலா மிடுக்குடன்

பளபள விழியுடன் பளிச்சிடும் கவர்ச்சியில்

சுளைபலத் தரும்கனிச் சுவையினை வனப்பினில்

விளைந்துள உடலிது விளைத்திடக் கிடைப்பதால்

மறந்திடும் கவலையும் மணமகன் வருகையால்

உறவினில் பெருக்கிய உவகையில் செழித்ததே!

கூவிடும் ஓசையும் சேவலின் ஆண்மையும்

மேவிடும் வாலிபம் மேனியில் ஓங்கிடக்

கூட்டிய  தோட்திறன் காட்டிய பேரெழில்

வாட்டிடும் ஆசையை வாழ்வினில் போக்கிடும்

நாளினை நோக்கியே நாட்களை ஓட்டிடும்

வேளையில் வேட்கையும் வேகமாய் நீண்டிடும்

ஆவலும் கூடுதே ஆண்மகன் மோகமும்

சேவலைப் போலவே  சீரிளம் கூடுமே!

-கவியன்பன் கலாம்