புத்தக மூட்டையின் புலம்பல்

புத்தகம் யாவும் சுமப்பதால்

வித்தக மென்று சொல்வதா?

ஓடி ஆடும் பருவமே

நாடி நரம்பும் சுருங்குமே



கணினி யுகத்தில் இப்படிப்

பணிய வைத்தல் பாவமே

சட்ட மன்றம் இன்னமும்

சட்டை செய்யா திருப்பதேன்?



பாரா ளுமன்றம் இன்னமும்

பாரா முகமாய் இருப்பதேன்?

முதுகு வலியும் முடமும்

புதிய வலியாய்ப் புறப்படும்



ஓட்டை முதுகெ லும்பினால்

நாட்டின் முதுகெ லும்புகள்

மூட்டைச் சுமக்கும் முயற்சியில்

நாட்டைச் சுமக்கப் பயிற்சியா?



போலி யோவின் மருந்துமே

போலி யாகி வருந்துமே

கேள்விக் குறியாம் முதுகிலே

கேள்விக் குறியாம் வாழ்விலே



நோட்டுச் சுமைகள் கூடவே

வீட்டுப் பாடம் சேரவே

களைத்துப் போகச் செய்வதால்

விளையும் பயிரும் முடங்குமே








--
”கவியன்பன்” கலாம், அதிராம்பட்டினம்