ஆசிரியர் தின வாழ்த்து
======================
கற்பிக்கும் ஆசிரியர் எல்லாரும்__ தன்
கடமைதனில் பாருலகில் ஒப்புவமை இல்லாராம்
சிற்பிப்போல் மாணாக்கர்ச் சிந்தை __மிகச்
செதுக்கிடுவர் அஃதே பெரிதான விந்தை!
ஆசிரியர் செய்யும் தொழிலால் __நம்
ஆர்வமும் கூராகும் வாழ்வின் எழிலால்
நேசமுடன் காட்டும் மதிப்பு__அவர்
நேர்மையை நம்பிள்ளைக் காணும் பிடிப்பு!
கண்டிப்புக் காட்டும் கடமை__அவர்
கண்ணியம் சொல்லும் குணத்தின் உடைமை
தெண்டித்து முன்னேற சொல்லும்__அவர்
திறன்மிகு வார்த்தையால் நம்வாழ்வு வெல்லும்!
மாற்றிவிடும் நம்மவர் வாழ்க்கை__
அவர்
மனமுவந்து சொல்லும் அறிவுரை வார்த்தை
ஏற்றிவிடும் செய்கையில் ஏணி__அவர்
எப்போதும் ஓடிக் களைக்காத தோணி!
சீர்படுத்தும் நோக்கில் உளியாவார் _ நாம்
சேரும் பயண இருளில் ஒளியாவார்
நேர்படுத்தும் பாதை வழிகாட்டி__அவர்
நித்தமும் ஓரிடத்தில் நிற்கின்ற கைகாட்டி!
அறிவெனும் கேணியின் ஊற்று__அவர்
"ஆக்ஸிஜன்" போன்றே இயக்குகின்ற காற்று
நெறியெனும் கோட்டிலே நம்மை _அவர்
நிற்கவைத்து ஆட்டுவித்தல் கட்டுப்பாட் டுண்மை!
"அக்னிச் சிறகாய்"ப் பறக்க__ நம்
அப்துல் கலாமய்யா போலச் சிறக்க
அக்னியின் குஞ்சென பாரதியாய்__தன்
அறவழியில் ஓட்டி நடத்துவதில் சாரதியாம்!
இராதா கிருஷ்ணர் பிறந்தநாள்__இன்று
ஏற்றம் தருமாசான் வாழ்வில் சிறந்தநாள்
நிராசை பெறும்ஏணிப் படிதான்_ இவர்
நிலைமட்டும் அப்படியே "ஏனிப் படியாய்?"
ஆக்கம்:
"கவியன்பன்" கலாம், அதிராம்பட்டினம்.
0 கருத்துகள் :
கருத்துரையிடுக