அமீரக தேசிய தினம்

December 02
UAE national day

வாசற் கதவைத் தட்டி
வாய்ப்புகளைக் கொட்டி
நேசமுடன் வரவழைத்த நாடு
நிதம்நிதம் அமீரகப் புகழ் பாடு!

வறுமை இருளை நீக்கிட
வந்தாரை வாழ வைத்துத்
திறமைகளை ஊக்குவிக்கத்
திக்கெட்டும் வாழ்கின்ற
"பாஸ்போர்ட்" பறவைகளின் சரணாலயம்;
பாலைவனத்தையே செழிப்பான
சோலைவனமாக்கிய ஆச்சர்யம்!

வானுயர்ந்த கட்டிடங்கள்
வடிவமைத்த உழைப்புகள்
மானுட சக்தியை
மதிக்கின்ற அழைப்புகள்

வழிபாட்டு உரிமைகள்
விழிபார்த்து வியக்கும்
அன்னை நாட்டின் பொருளாதாரம்
அதிகம் பலம்பெறவே
அன்னிய நாடாயினும்
அரவணத்த அமீரகமே!

-

*கவியன்பன் கலாம்*